Na Mwandishi Wetu
TUME Huru ya Taifa ya Uchaguzi (INEC) imeeeleza kuwa watu wote wenye sifa za kuandikishwa kuwa wapiga kura wataandikishwa hata kama hawana kitambulisho cha Taifa kinachotolewa na Mamlaka ya Vitambulisho vya Taifa (NIDA).
Akiwasilisha mada katika mkutano wa maofisa habari wa Mikoa na Halmashauri, Mkurugenzi wa Idara ya Habari na Elimu ya Mpiga Kura wa Tume Huru ya Taifa ya Uchaguzi, Bi.Giveness Aswile amefafanua kuwa na kadi ya NIDA sio kigezo cha kuandikishwa kwenye Daftari la Kudumu la Wapiga Kura.
"Wananchi wote wenye sifa wataandikishwa bila kujali kama wana kadi ya NIDA au la," amesema Aswile huku akitaja mambo yatakayohusika kwenye uboreshaji wa daftari.
Ametaja mambo hayo ni kuandikisha wapiga kura wapya ambao ni raia wa Tanzania wenye umri wa miaka 18 na zaidi na watakaotimiza umri huo ifikapo tarehe ya uchaguzi mkuu 2025
na kutoa fursa kwa wapiga kura waliopo kwenye daftari na ambao wamehama, waweze kuhamisha taarifa zao kutoka kata au jimbo walioandikishwa awali.
Mambo mengine ni kutoa fursa kwa wapiga kura walioandikishwa kurekebisha taarifa zao yakiwemo majina na taarifa nyingine, kutoa kadi mpya kwa wapiga kura waliopoteza
kadi au kadi zao kuharibika na kuondoa wapiga kura waliopoteza sifa za kuwemo kwenye Daftari kutokana na sababu mbalimbali ikiwa ni pamoja na kuukana uraia wa Tanzania au kifo.
Kuhusu kikao na Maofisa habari hao,amesema mkutano huo unahitimisha mfululizo wa mikutano ambayo Tume imefanya na wadau wake kauanzia Juni 7 Juni, mwaka 2024.
"Baadae Tume itafanya mikutano na wadau kwenye mikoa yote
kwa kuzingatia ratiba ya uboreshaji wa Daftari.Mikutano hiyo ina lengo la kuwapa wadau taarifa za uwepo wa
zoezi la uboreshaji wa Daftari la Kudumu la Wapiga Kura na kuwapitisha katika vifaa na mifumo ya uandikishaji pamoja na kuona namna zoezi litakavyofanyika vituoni."
0 Comments